Bheema – போய்டாதீங்க ப்ளீஸ்ஸ்ஸ்ஸ்ஸ்ஸ்

ஆண்டவா, இந்த லிங்குசாமி கிட்டேந்து, தமிழ் சினிமா ரசிகர்களைக் காப்பாத்து…..

கடந்த ஐந்து வருடங்களில், பீமா என்கிற இந்தப் படத்தைவிட கேவலமான / மோசமான ஒரு படத்தைப் பார்த்த நினைவில்லை.

இவர்களுக்கு எல்லாம் ஃபைனான்ஸ் பண்ணுகிற மகானுபாவனை நினைத்தால் தான் கவலையாக இருக்கிறது.

Saawariya = சாவறியா?

” மச்சீ….போய் சாவலாம் வரியா? “

” என்னது?”

” அச்சோ…சாரி சாரி…… சாவரியா போலாம் வரியான்னு கேக்க நினைச்சேன்”

” த்தோடா… அதுக்கு வேற ஆளைப் பாரு”

இந்தப் படத்துக்குப் போய் தண்டம் அழுவானேன் என்று தோன்றினாலும்…..ரொம்பத்தான் ஓவராக ஃபிலிம் காட்டுகிறார்களே… அப்படி என்னதான் இருக்கும் என்று ‘இறக்கி’ பார்த்தேன்..

முதல் அரை மணிநேரத்துக்குள்ளாகவே தெரிந்து போயிற்று, இது வேலைக்காகாது என்று. இலக்கியத்தரமான சிறுகதை ஒன்றைத் திரைப்படமாக்கிய விதத்தில், சமீப வருடங்களில் வெளியாகி தேசிய விருது வரை சென்ற அற்புதமான இயற்கை க்கும், அதே கதையை வைத்து எடுக்கப்பட்ட படு செயற்கையான இந்தப் படத்துக்கும் தான் எவ்வளவு வித்தியாசம்?

எல்லாம் ஃபாரீன் ப்ரொட்யூசர் கொண்டு வந்து கொட்டின காசு பண்ற வேலை… வேற என்ன?

Dear Mr.Maniratnam….

ஹாசினி திரைப்பார்வையில் உங்க ஊட்டுக்காரம்மா சுஹாசினி சொன்னது….

கண்ணாமூச்சி ஏனடா திரைப்படம் , காதலிக்க நேரமில்லை படம் போல நகைச்சுவையாக இருக்கிறது

என் கேள்வி : கொஞ்சம் கூட யோசிக்காம இந்த மாதிரி சரமாரியா ‘குண்டு’ வீசறாங்களே…எப்படி சார் வீட்ல சமாளிக்கிறீங்க?

சமீபத்தில் பார்த்த படங்கள் :

தமிழ்ப்பட டிவிடிக்கள் இப்போது சல்லிசான விலையில் கிடைக்கின்றன.பார்க்குமிடமெல்லாம் வாங்கிக் குவித்துக் கொண்டிருக்கிறேன். கடந்த மாதம், அந்தக் குவியலில் இருந்து தேர்ந்தெடுத்துப் பார்த்த சில படங்கள் :

நூற்றுக்கு நூறு (1967)/ தமிழ் : கே.பாலசந்தர் எடுத்த படங்களிலே, உருப்படியான சிலவற்றுள் ஒன்று. கணிதப் பேராசிரியர் ஜெய்சங்கர் மீது மூன்று இளம் பெண்கள் அபாண்டமாகக் குற்றம் சாட்டி ஜெயிலில் அடைக்க, அதில் இருந்து புத்திசாலித்தனமாகத் தப்பிப்பதே கதை. நாகேஷ் கூட சகமாணவராக , வெள்ளை பல்லி தோற்றத்திலே ஒட்டிக் கொண்டு வருபவர், ரொம்ப பழக்கமான முகம் போல இருக்கும். அவர், பின்னாளிலே பிரபலமாக ஒய்ஜி மகேந்திரன். ‘உன்னை வாழ்த்திப் பாடுகிறேன்’ பாடலை மட்டும் வைத்துக் கொண்டு மீத முள்ள பாடல்களை FFசெய்து விடலாம்.

ப்ரீதி ப்ரேமா ப்ரணயா (2003) / கன்னடம் : பார்த்ததும் பாய்ந்தோடி வாங்கியதற்கு இரண்டு காரணங்கள். ஒன்று : அனந்தநாக். இரண்டு : இயக்குனர் கவிதா லங்கேஷ். எளிமையானது போலத் தோன்றும் ஆனால், கொஞ்சம் ஆழமான, நுட்பமான உணர்வுகளைத் உசுப்பும் கதை. சீனியர் சிட்டிஸன்கள் அனந்த் நாக் மற்றும் பாரதி ஆகிய இருவருக்கிடையே தோன்றும் நட்பும், அதனால் பிள்ளைகளுக்கு ஏற்படும் தர்மசங்கடங்களைப் பற்றிய கதை. மூன்றம் தலைமுறையைச் சேர்ந்த டீனேஜ் பேரனும் பேத்தியும் ரொம்ப சிம்பிளாக எடுத்துக்கொண்டு, பெருசுகளுக்கு உதவி செய்வது கிளை சுவாரசியம். பாக்ஸ் ஆபீஸ் ரிசல்ட் பற்றி தெரியவில்லை.

கை கொடுத்த தெய்வம் (1964) / தமிழ் : படத்தை வாங்கியதற்குக் முக்கியமான மூன்று காரணங்கள். சாவித்திரி, சாவித்திரி மற்றும் சாவித்திரி. சில சமயங்களில் சிவாஜிகணேசன் உரசிய உயரங்களைக் கூட அசால்ட்டாக தாண்டிச் சென்று விடுகிறார் என்று தோன்றும். குழந்தைமை மாறாத பெண்ணான சாவித்திரியைச் சுற்றி நடக்கும் கதை. எஸ்.எஸ்.ராஜேந்திரன் நடித்து, எனக்குப் பிடித்த படங்களுள் ஒன்று. சாவித்திரியின் திருமணம் தொடர்பாக எஸ்.எஸ்.ராஜேந்திரன் மற்றும் நடிகர் திலகத்துக்கும் நடக்கும் உணர்ச்சிகரமான வாக்குவாதக் காட்சிதான், பின் நாட்களில், கே.எஸ்.கோபாலகிருஷ்னணின், தொடர் மெலொடிரமாக்களுக்கு அஸ்திவாரம் போட்டது என்று யாராவது சொன்னால், கேள்வி கேட்காமல் ஒத்துக் கொள்ளலாம்.

வெற்றி விழா (1987) / தமிழ்: லுட்லம் நாவலைச் சுட்டு எடுத்தால் எனக்கென்ன? படம் நல்லா இருக்கா அவ்ளோதான் . பிரபு , குஷ்பு, சின்னி ஜெயந்த் போன்ற பாத்திரங்களை கூடச் சேர்த்து மசாலா தாளித்துச் செய்யப்பட்ட ஜாலியான படம். லாஜிக் எல்லாம் பார்க்காமல் ஜாலியாகப் பார்க்கலாம். திரும்பப் பார்க்கும் வாய்ப்புக் கிடைத்தால் பிரபு, கமல் ஆகியோர் தோன்றும் இடங்களில் எல்லாம் ராஜாவின் பின்னணி இசையைக் கூர்ந்து கேளுங்கள். சொ(ர்க்)கம்….

ஆட்டா (2007) / தெலுங்கு: வில்லனை வித்தியாசமான முறையில் பழிவாங்கும் கதை. வில்லன் வீட்லியே டேரா அடித்து கூட இருந்தே குழிபறித்து, காதலியைக் கைப்பிடிக்கும், ஹீரோவாக பாய்ஸ், ஆய்த எழுத்து படங்களில் பப்பு வேகாமல், தெலுங்கு பக்கம் போன சித்தார்த். இவர் முதன் முறையாக ஆக்ஷன் ஹீரோவாக நடித்த படமாம். படத்தின் வேகம் மற்றும் இலியானாவுக்காக ஒரு தரம் பார்க்கலாம்.

சிஐடி சங்கர் (1970) / தமிழ்: வெளிநாட்டு அரசியல் தலைவர் ஒருவர் வருகிறார். தீவிரவாதக் கும்பல் ஒன்று,ஒரு பெண் கையில் டைம்பாம் வைத்த பூமாலை கொடுத்து, தலைவரை வரவேற்கும் இடத்தில் வைத்துக் கொல்கிறது. [ராஜீவ் காந்தி கொலைச் சம்பவம் நினைவுக்கு வருகிறதா? . ] இதைத் துப்பறிந்து கண்டுபிடிக்க வருகிறார் தென்னகத்து ஜேம்சுபாண்டு ஜெய்சங்கர். டிப்பிகல் மாடர்ன் தியேட்டர்ஸ் படம். ஆசுயூசுவல், இசை , வேதா. சுட்டபழம்.

கலியுகம் (1988) / தமிழ்: பள்ளி கல்லூரி நாட்களில் பார்த்து ஏதோ காரணத்துக்காக மனதில் தங்கிப் போய், பின்னர் வேறு சந்தர்ப்பங்களில் காணக் கிடைக்காத சில படங்களை, பிற்காலங்களின் பார்க்கும் போது சே.. இதைப் போயா அப்போது பார்த்தோம் என்று தோன்றும். கலியுகம் அந்த வகையிலானது. பார்த்த போது ஏன் பச்சக்கென்று மனசில் ஒட்டிக் கொண்டது என்பதற்கு விடை, சில நிமிடங்களிலேயே கிடைத்தது.

அமலா…. ஹூம்ம்ம்ம் .

பல வருட இடைவெளிக்குப் பிறகு, அமைதியான வேட்டி சட்டை வில்லராக நடித்த பி.எஸ்.வீரப்பா, படத்தின் saving grace. மொத்ததிலே குப்பை.

வறுமையின் நிறம் சிவப்பு (1980) / தமிழ்: ரங்கா ரங்கைய்யா எங்கே போனாலும் மனதுக்கு ரகசியம் சுமைதானே என்று நளினமாக ஆடிப்பாடும் ஸ்ரீதேவிக்காகவும், கட்டக்கடேசி காட்சியில், சில நிமிஷங்கள் மட்டுமே வந்து கலக்கும் தேங்காய் ஸ்ரீனிவாசனுக்காக மட்டுமே பார்த்தேன். எத்தனையாவது முறை என்று நினைவில்லை. இந்தாளுக்கு ( கே.பாலசந்தர் ) subtelty என்றால் என்ன என்றே தெரியாது என்று உறுதியாக முடிவுக்கு வரவைத்த படம். சாக்கடையில் இருந்து ஆப்பிளைப் பொறுக்கி, தின்ன முயல அதை நாலு பேர் , கமலிடம் இருந்து பிடுங்கிக் கொண்டு ஓடும் காட்சி ஒரு க்ளாசிக் உதாரணம்.

சிம்லா ஸ்பெஷல் (1982) / தமிழ்: நுனி மூக்கில் கண்ணாடி மாட்டிக் கொண்டு, அனாயசமாக நகைச்சுவை செய்யும் ஸ்ரீப்ரியாவுக்கு அர்ப்பணம். மௌலி, விசு தவிர, அந்த காலகட்டத்தின் மேடை நாடக நடிகர்கள் அனைவரும் தோன்றிய படம். வார்த்தைக்கு வார்த்தை ஜோக் அடிக்கும் க்ரேசி மோகன் டைப் வசனங்கள். சிம்பிளான கதை. வேறு வழியில்லாமல், நாடகத்துக்குக் கதையை வாங்க வரும் கமலஹாசன், சேகர் கோஷ்டியை, தேங்காய் ஸ்ரீனிவாசன் ( கௌரவ வேடம் ), ‘வித்து போச்சே, அய் வித்து போச்சே’ என்று கலாய்க்கும் காட்சி, குடுத்த துட்டுக்குப் போனஸ்.

ராஜமாணிக்கம் (2005) / மலையாளம்: இந்தப் படம் கேரளாவிலே சூப்பர் ஹிட்டாம்… சேரநாட்டு மக்களைப் புரிஞ்சுக்கவே முடியலைப்பா

யார் பையன் (1957) / தமிழ் : க்ளீன் காமெடி. சாவித்திரியை டாவடித்துக் கல்யாணம் கட்டிக் கொள்ள நினைக்கும் பொழுது, ஒரு குட்டிப்பையன், நீதான் என் அப்பா என்று ஜெமினி மாமா முன் வந்து நிற்க, குழப்பங்களைக் களைந்து சாவித்திரியைக் கைபிடிப்பதுதான் கதை. ஜெமினி கணேசனின் அம்மா அப்பாவாக என்.எஸ். கிருஷ்ணன், டி.ஏ.மதுரம். சாவித்திரியை ஒரு தலையாகக் காதலிக்கும் டி.ஆர்.ராமச்சந்திரன். உன் அப்பா பேர் என்ன என்று யார் கேட்டாலும், அட்சர சுத்தமாக ‘ ஸ்ரீமான் சுந்தரராஜன்’ என்று சமய சந்தர்ப்பமில்லாமல் படுத்தி எடுக்கும் அந்த வடக்கத்திக் குழந்தை. கலாட்டாவுக்குக் கேக்கணுமா?கண்டசாலாவின் சுயநலம் பெரிதா பாடல், போனஸ் சந்தோஷம். தட்சிணாமூர்த்தியின் இசை.

இன்னும் ஏகத்துக்கு வாங்கிக் குவித்திருக்கிறேன். அவ்வப்போது, இது போல பட்டியல்கள் வரும்.

Sivaji Rules and How….

ஒரு அபத்தமான கதைக் கருவை லாஜிக்கே இல்லாத திரைக்கதையாக்கி அதை மூன்று மணிநேரம் ஓடும் படமாக எடுத்தால், அப்படத்தை சில நூறுகள் செலவழித்து முன்பதிவு செய்து, கோஷ்டியாகச் சென்று காட்சிக்கு காட்சி விசிலடித்துக் கொண்டு பார்க்கவும், இன்னும் கொஞ்ச நேரம் தொடரக்கூடாதா என்று ஏக்கத்துடனும் வெளியே வருவதற்கும் , ஞாயிற்றுக் கிழமை அன்று திரும்பவும் இன்னொரும் முறை பார்க்க வேண்டும் என்று நினைப்பதற்கும் அந்தப் படத்தின் கதாநாயகனாக தலைவர் இருக்க வேண்டும்.

இருக்கிறார்.

இணையத்தில் உலாத்திக் கொண்டிருந்த போது, ஒருவர் , சிவாஜியை விமர்சனம் செய்து எழுதியதில் ஒரு வாசகம் பச்சக்கென்று மனசில் ஒட்டிக் கொண்டது.

Rajnikanth is a phenomenon which cannot be understood by those who didnt watch his movies when they grew up.

உண்மை.