கோவை ஸ்ரீகிருஷ்ணா ஸ்வீட்ஸ் குழுமம், ‘ ரசம்’ என்ற பெயரிலே கொங்கு நாட்டு உணவகம் ஒன்றைத் திறந்திருக்கிறது. புரசைவாக்கம் அண்ணாமலைச் சாலையில், MCtM பள்ளிக்கு அருகிலே , ஒரு பழங்காலத்து வீட்டை, பாரம்பரியம் கெடாமல் சீரமைத்து, அருமையான பராமரிக்கிறார்கள்.

சென்னையில் செட்டிநாடு உணவகங்களுக்குப் பஞ்சமில்லை. அதென்ன கொங்குநாட்டு உணவு என்ற ஆர்வத்திலே தான் சென்றிருந்தோம்.

பொள்ளாச்சி, திருப்பூர், கோவை, உடுமலைப்பேட்டை, பள்ளிப்பாளையம், காங்கேயம், அவினாசி ஆகியவை உள்ளிட்ட பிரதேசங்களின் சிறப்பான சைவ உணவு வகைகளை இங்கே ஒரிஜினல் சுவை மாறாமல் அளிக்கிறார்கள் அல்லது அப்படிச் சொல்கிறார்கள்.

* அனேகமாக எல்லா ஐட்டங்களிலும் வேர்க்கடலை உபயோகிக்கிறார்கள்.

* சுவைகளிலே வித்தியாசம் தெரிகிறது. நிசமாகவே கொங்குநாட்டு ஃப்ளேவர் இருக்கிறதா என்பதை விஷயமறிந்தவர்கள்தான் சொல்ல வேண்டும்.

* மெனுகார்டில் ஏகப்பட்ட ஐட்டங்கள் இருந்தாலும், அவை இரவில் மட்டுமே. மதியம் ஒன்லி மீல்ஸ்.

* வத்தக்குழம்பு போல கொழ கொழ என்று இருந்த ஒன்றைச் சந்தேகத்துடன் பார்த்த போது, சும்மா டேஸ்ட் பண்ணிப்பாருங்க சார்.. கருப்பட்டி பாயசம்… நல்லா இருக்கும் என்று உணவு பரிமாறியவர் ஆலோசனை சொன்னார். கருப்பட்டியையும் ஜவ்வரிசியையும் சேர்த்துச் செய்த ஐட்டம் அது. அட்டகாசமாக இருந்தது. அதே போல குங்குமப்பூ தோசை + வாழைப்பூ வடையும்.

* எரிச்சல் ஏற்படுத்தாத நல்ல சர்வீஸ்.

* முடிவிலே வாழைப்பழம், பீடா போன்றவற்றுக்குப் பதிலாக துளிர் வெற்றிலை, சுண்ணாம்பு & பாக்கு.

விலை விவரம் : தோராயமாக ரூ 350/- ( இருவருக்கு )